د غزې روغتیایي چارواکي: په تېرو ۲۴ ساعتونو کې ۱۷۴ کسان وژل شوي دي
د غزې روغتیایي چارواکي وایي، چې په تېرو ۲۴ ساعتونو کې د اسراییل بریدونو کې۱۷۴ کسان وژل شوي دي. د غزې په سویلي برخه خان یونس کې اوسیدونکي وایي، د یادې سیمې دوه لویو روغتونونو ته څېرمه د ټانکونو ډزو او بمباریو غږونه اوریدل شوی دی.
د غزې روغتیايي چارواکو د شنبې په ورځ ویلي، چې په تېرو ۲۴ ساعتونو کې د ۱۷۴ وژل شویو کسانو په ګډون تر اوسه ۲۶زره ۲۵۷ فلسطینیان د اسراییل په بریدونو کې وژل شوي او شاوخوا ۶۵ زره نور ټپیان شوي دي. د غزې ۲.۳ میلیون وګړو یو لویه برخه هم د دغو بریدونو له امله بې ځایه شوې ده.
حماس ویلي، د دوی جنګیالیو د خان یونس په سویل لویدیځ کې یو اسراییلي ټانک د ټانک ضد پر توغندي ویشتلی دی.
د اسراییل پوځ وايي، لږ تر لږه ۱۱ وسله وال یې وژلي دي او زیاته کړې یې ده چې دغو وسله والو غوښتل پوځیانو ته چاودېدونکي توکي په ځای کړياو پر هغوی یې د توپونو او توغندیو بریدونه کول.د پوځ په وینا، په تېره اوونۍ کې کمانډو ځواکونو له سلو ډېر وسله وال وژلي او د وسلو پر زېرمو يې چاپې وهلي دي.
د فلسطین اسلامي جهاد ډله چې د حماس متحده ده، ویلي یې دي چې د دوی وسله وال له اسراییلي ځواکونو سره په نښتو کې ښکیل دي او دغه راز پر اسراییلو یې توغندي توغولي دي.
د فلسطین سرې میاشتې ټولنې د غزې د روغتیا وزارت په حواله ویلي، چې اسراییلي الوتکو په سویل کې تر ټولو لوی فعال طبي مرکز، ناصر روغتون او المال روغتون ته نږدې بریدونه کړي،چې یو کس یې د روغتون په انګړ کې وژلی دی.
نړۍوالې محکمې د جمعې په ورځ اسراییل ته امر وکړ چې د فلسطینیانو د نسل وژندې د مخنوي لپاره د پام وړ اقدامات ترسره کړي.
اسراییل پر غزه خپل هوایي، سمندري او ځمکني بریدونه وروسته له هغه پیل کړل چې د حماس ډلې وسله والو د اکټوبر په اوومه په اسراییل برید وکړ، چې پایله کې یې ۱۲۰۰ ملکي کسان ووژل شول او ۲۵۳ تنه یرغمل شول.
