یوې سروې موندلې چې د هند په وارانسي ښار کې یو جومات د مندر پر سر جوړ شوی
پر مسلمانانو د هندو عریضه کونکو وکیل ویلي، چې د هند د لرغون پېژندنې سروې موندلې چې د هندوانو یو ترټولو سپیڅلي ښار کې د ۱۷مې پیړۍ یو جومات د هندوانو د یوه معبد له ویجاړولو وروسته جوړ شوی و. دغه نوې موندنه ښايي د مسلمانانو او هندوانو ترمنځ د لسیزو اوږدې شخړې کې یوه نوې موضوع وي.
د وارانسی په ښار کې محکمې تته د وړاندې شوې دغې قضیې په اړه د مسلمانانو وکیلانو د هندو عریضه کونکو د وکیل له دغو څرګندونو سره مخالفت کړی خو نور جزییات یې ندي ورکړي.
د ګیانواپي جومات په وارانسی ښار کې موقعیت لري او دغه ښار د لومړي وزیر نریندرا مودي پارلماني حوزه هم ده، او نوموړي به له دغه ښاره ځان کاندیدوي.
د هندو عریضه کونکو وکیل وشنو شنکر جین د پنجشنبې په ورځ خبریالانو ته ویلي: "د محکمې د حکم له مخې د شوې سروې پر مهال د هندوانو د خدایانو د مجسمو پاتې شوني د جومات په تاکاوۍ کې موندل شوي دي."
مسلمانان، په هندو اکثریت هند کې تر ټولو لوی اقلیت دی. هندو سخت دریځو، د هغو ډلو په شمول چې د مودي ګوند پورې تړلي، د لسیزو راهیسې ویلي چې مغل واکمنانو د سیمو له فتحې وروسته د هندوانو پخواني معبدونو ویجاړ کړي او پر ځای یې خپل عبادت ځایونه جوړ کړي دي.
د دا ډول موضوعاتو پر سر وخت په وخت د هندوانو او مسلمانانو ترمنځ تاوتریخوالی رامنځ ته شوی دی.
