امریکا په عراق کې د ایران پر ملاتړ وسله والو ملېشو هوايي بریدونه کړي

د امریکا مرکزي قوماندانۍ سنټکام په عراق کې د کتائب حزب الله او څو ایراني وسله والو ملېشو په مرکزونو د هوايي برید خبر ورکړی. په دغو بریدونو کې د کتائب حزب الله مرکزونه، ګودامونه او د روزنې ځایونه د توغندیو او بې پیلوټه الوتکو له لوري په نښه شول.

د امریکا دفاع وزارت په یوه بیان کې لیکلي، چې امریکا په دغه برید کې د ایران ملاتړو وسله والو ډلو له خوا کارول شوي تاسیسات په دریو ځایونو کې په نښه کړي دي.
د امریکايي چارواکو په وینا د حماس له خوا پر اسراییل له برید وروسته د دغه هېواد ځواکونه په عراق او سوریه کې شاوخوا ۱۵۰ ځله تر بریدونو لاندې راغلي.
د دې اوونۍ د شنبې په ورځ په یوه تازه پېښه کې، په عراق کې د متحده ایالاتو پر پوځي اډه د ایران پلوه ملیشو له خوا په برید کې لږ تر لږه څلورو امریکایي پوځيانو دماغي زیان لیدلی.
د امریکا د دفاع وزیر لویډ اسټین په یوه بیان کې لیکلي چې په عراق کې د کتائب حزب الله او څو نورو ملېشه ډلو پر مرکزونو د دغه هېواد د ځواکونو برید په عراق او سوریه کې د امریکا او ټلوالې ځواکونو پر ضد د ایران پلوه ملېشو د یو لړ پراخو بریدونو مستقیم ځواب دی.
رويټرز د يوې روغتیایي سرچينې او د ملېشو يوې سرچينې په حواله ليکلي، چې په عراق کې د امريکا په بريدونو کې لږ تر لږه دوه ایراني پلوه ملېشه وسله وال وژل شوي او څلور نور ټپيان دي.
په همدې حال کې د لبنان د کتائب حزب الله نظامي ویاند جعفر الحسیني په اېکس پاڼه لیکلي چې دغه ډله به د غزې د محاصرې تر پای ته رسېدو پورې د «دښمن» پر اډو بریدونه روان وساتي.
امریکا په سوریه کې ۹۰۰ او په عراق کې ۲۵۰۰ عسکر لري چې د داعش له ګواښونو سره د مبارزې په برخه کې د دغه هېواد له ځواکونو سره مرسته کوي.