په غزه کې په تېرو ۲۴ ساعتونو کې شاوخوا ۲۴ اسراییلي سرتېري وژل شوي
د اسراییل پوځ د سې شنبې په ورځ په غزه کې د لږ تر لږه ۲۴ اسراییلي سرتیرو د وژل کېدو خبر ورکړ. دا د اکټوبر میاشتې د جګړو له پیل څخه تر اوسه پورې په یوه شپه او ورځ کې د اسراییلي سرتېرو د تلفاتو تر ټولو لوړه شمېره ده.
د اسراییل د پوځ ویاند دانیل هاګاري خبریالانو ته ویلي، چې ۲۱ سرتیري پولې ته نږدې په کیسوفیم سیمه کې د چاودنو له امله وژل شوي دي.
د نوموړي په خبره؛ حماس ډلې د اسراییلي ځواکونو ټانک په راکټ ویشتلی او له دې سره سم په دوو دوه پوړییزه ودانیو کې چاودنې هم شوې دي.
د دې چاودنې له امله ودانۍ په داسې حال کې نړېدلې دي، چې ډېری اسراییلي ځواکونه ودانۍ ته نږدې او یا هم په ودانیو کې دننه وو.
هاګاري ویلي، چې د احتمال له مخې چاودنې د اسراییلي ځواکونو له خوا په ودانیو کې د اېښودل شویو ماینونو له امله رامنځته شوې وي؛ خو بیا هم د پېښې په اړه څېړنې روانې دي.
