د روسیې د تیلو د تولید یو ترمینل کې د شکمنې اوکرایني ډرون الوتکې د برید له امله اور لګېدلی
د روسیې تر ټولو سترې د ګازو د تولید کمپنۍ نووټیک پورې اړوند د بالتیک سمندریز ترمینل کې د یوې شکمنې اوکرایني بې پیلوټې الوتکې له برید وروسته اور لګېدلی او دغه کمپنۍ یې دې ته مجبوره کړې، چې هلته ځینې چارې وځڼډوي.
د اوست-لوګا په نوم دغه ترمینل د سین پیټرزبورګ لویدیځ څخه شاوخوا ۱۷۰ کیلومتره لرې د فنلینډ په خلیج کې موقعیت لري.
د نووټیک ویب پاڼې په وینا؛ دغلته د ګازو د تولید ترڅنګ د جیټ الوتکو تیل، مایع ګاز او د موټرو تیل هم پروسس کیږي او د بندر له لارې دغه پروسس شوي محصولات نړۍوالو بازارونو ته لېږدولو کیږي.
د انټرفکس-یوکراین خبري اژانس د خپلو سرچینو په حواله ویلي، چې اورلګېدنه د اوکراین د امنیتي خدماتو له خوا د ځانګړو عملیاتو پایله کې رامنځته شوې ده.
په دغه رپوټ کې د یوې اوکراینې سرچینې له قوله ویل شوي: “په سیمه کې د اوست-لوګا د تېلو ترمینل د دښمن لپاره یو مهم مرکز دی. هلته تصفیه شوي تیل، د روسي پوځیانو ته استول کیږي.”
د روسیې د لیننګراد والي الکساندر دروزډینکو د ټیلیګرام له لارې ویلي، په دې پېښه کې مرګ ژوبله نه ده رامنځته شوې او ټول کارګران په خوندي توګه ایستل شوي دي.
روسي رسنیو ویلي، چې په برید کې د تیلو دوه ټانکرو او یو د تیلو پمپ زیانمن شوي؛ خو اوس اورلګېدنه تر کنټرول لاندې ده.
نووټیک کمپنۍ په یوې اعلامیه کې ویلي، چې له اورلګېدنې وروسته د دوی ځینې چارې ځڼډېدلي دي او دا چې اورلګېدنه د بهرني نفوذ له امله رامنځته شوی.
په دې وروستیو کې روسیه او اوکراین د اکمالاتو او لوژستیک د زیانمنولو په موخه د یو بل د انرژۍ پر زېربناو بریدونه کوي.
دغه دواړه لوري په روانې نږدې دوه کلنه جګړه کې په دې لټه کې دي، چې یو بل کمزوری کړي؛ خو د جګړې د پای ته رسېدو نښې لا نه لیدل کیږي.
