سوریه کې د ایران «د قدس د استخباراتو د مرستیال په ګډون» څلور پوځي مشاوران ووژل شول

د ایران سپاه پاسدران وايي، د دې ځواکونو د بهرنۍ څانګې قدس څلور لوړپوړي پوځي مشاوران نن د سوریې پلازمېنه دمشق کې د اسراییل د برید له امله وژل شوي دي. د ایراني رسنیو د راپور له مخې په وژل شویو کې د قدس ځواکونو د استخباراتو مرستیال صادق امیدزاده هم دی.

د سپاه پاسدران د عامه اړیکو اداره په اعلامیه کې وايي، په دې برید کې حجت الله امیدوار، علي اقازاده، حسین محمدي او سعید کریمي وژل شوي دي.

سپاره پاسدران دا کسان لوړپوړي مشاوران بللي، خو د دې ځواکونو د قدس څانګې د یوه مرستیال صادق امیدزاده د وژل کېدو په هکله یې څه نه دي ویلي، خو ډېرو ایراني رسنیو ویلي چې په دغه برید کې نوموړی وژل شوی دی.

صادق امیدزاده سوریه کې د کورنۍ جګړې له پیلیدو راهیسې د بشار اسد په ملاتړ جګړه کې ښکېل و.

ویل کېږي نوموړی ۱۱ کاله مخکې د هغو ایرانیانو په ډله کې و چې د سوریې یوې وسلوالې ډلې نصرت جبهې نیولي وو او وروسته د قطر په منځګړتوب خوشي شول.

سپاه پاسداران وايي، په ننني برید کې د سوریې ځواکونو ته هم مرګ ژوبله اوښتې ده.

ویل کېږي برید د دمشق په داسې سیمه کې شوی چې د بهرنیو هېوادونو ډيپلوماټان پکې استوګن دي.

دا برید په داسې مهال دی چې له څو میاشتو راهیسې د اسراییل او حماس جګړه پیل شوې ده.

د دې جګړې په بهیر کې د یمن حوثیان او د لبنان حزب الله ډله هم وخت ناوخت له اسراییل سره ټکر لري او له امله یې د ایران او اسراییل ترمنځ د جګړې د پراخېدو وېره پیدا شوې ده.