د ترکیې په ختیځ کې د داعش شپږ مشکوک وسلوال نیول شوي دي
ترکي رسنیو ته امنیتي سرچینو د جمعې په ورځ ویلي، چې پولیسو د ترکیې په ختیځ کې د داعش شپږ شکمن وسلوال نیولي دي.
دغو سرچینو چې له رسنیو سره د خبرو کولو د محدودیت له امله یې د نوم له اخیستو ډډه کړې، ویلي، چې په الازیغ ولایت کې د ترهګرۍ ضد پولیسو شپږ شکمن کسان له داعش سره د اړیکو او تړاو په تور نیولي دي.
له دغو شکمنو کسانو یو تن په ضمانت خوشی شوی او پنځه نور به یې له ترکیې وشړل شي.
په ۲۰۱۳ کې، ترکیه یو له لومړنیو هیوادونو څخه و چې داعش یې ترهګره ډله اعلان کړه.
ترکیه له هغه وخت راهیسې څو ځلې دې ډلې له بریدونو سره مخامخ شوې او لږ تر لږه ۱۰ ځانمرګو بریدونو، اوو بمي چاودنو او څلورو وسله والو بریدونو کې تر ۳۰۰ ډېر کسان وژل شوي او سلګونه نور ټپیان شوي دي.
د دغو بریدونو په ځواب کې، ترکیې په کور دننه او بهر د دې ډلې پر ضد عملیات کړي ترڅو د نورو بریدونو مخه ونیسي.
