پر ایران د پاکستان برید: پاکستان د اورپکو د وژلو ادعا کوي خو ایران وايي ملکي وګړي وژل شوي
د پنجشنبې په ورځ سهار وختي د ایران پر سیستان - بلوچستان ولایت د پاکستان د توغندیو بریدونو وروسته یوه لوړپوړي پاکستاني امنیتي چارواکي پاکستاني رسنیو ته ویلي، چې په دغه برید کې ۵ بلوچ جنګیالي وژل شوي او دوه نور ټپیان دي.
دغه پاکستاني چارواکي چې د خپل نوم له ښودلو یې ډډه کړي ويلي، چې دغه وژل شوي کسان د بلوچ د خپلواکۍ جبهې غړي دي او ټول هغه کسان دي چې پاکستان یې د وژلو په لټه کې و.
د سرچینې په وینا؛ په وژل شویو کې د بلوچ د خپلواکې جبهې قوماندان دوستا الیاس د دې جبهې غړی بجار الیاس سوغات په ګډون د بلوچ قوماندان اسغر الیسا بشام زوی او خور یې هم شامل دي.
د سیستان - بلوچستان د ولایت امنیتي مرستیال جاوا مرحمتي ایراني رسنیو ته ویلي، چې د پاکستان له لوري په سرحدي سیمه کې یو کلي په توغندیو لګیدلی او په دې پیښه کې درې مېرمنې او څلور ماشومان وژل شوي دي.
ښاغلي مرحمتي ویلي، چې وژل شوي کسان ایراني وګړي نه دي.
تر دې وړاندې د ایران دولتي خبري اژانس تسنیم خبر ورکړی و، چې نن سهار د سیستان - بلوچستان ولایت پر یوه سرحدي کلي له برید وروسته په تهران کې د پاکستان شارژدافیر د بهرنیو چارو وزارت ته ورغوښتل شوی، چې د پېښې په اړه وضاحت ورکړي.
