د اوکراین د ځمکنیو ځواکونو قوماندان: لا ډیرو پوځي الوتکو ته اړتیا لرو
د اوکراین د ځمکنیو ځواکونو قوماندان وايي چې کییف د خپلو جنګي هڅو لپاره لا ډیرو پوځي الوتکو ته اړتیا لري. هغه وايي د دوی د اړتیا وړ الوتکو لکه د امریکا A-10 جنګي جېټ چې د پیاده ځواکونو او الوتکو ملاتړ کوي او داسې نورې الوتکې دي چې د اوږد واټن توغندي وتوغوي.
۵۸ کلن ډګر جنرال اولیکسندر سیرسکي د رویټرز سره په ځانګړې مرکه کې ویلي: "د امریکا A-10 جنګي جېټ زمونږ د اړتیا وړ الوتکه ده که چیرې یې دوی موږ ته راکړي... دا یو نوی ماډل الوتکه نه ده، مګر یو باوري الوتکه ده چې په ډیرو جګړو کې یې ځان ثابت کړی، او د وسلو پراخ ډولونه لري. د ځمکنیو اهدافو په له منځه وړلو کې له پیاده عسکرو سره مرسته کولای شي.
د امریکا A-10 جنګي جېټ د دغه هیواد له خوا په لومړي ځل په ۱۹۷۰ ام کال کې جوړې شوي او تر اوسه ترې په پراخه توګه کار اخیستل کیږي.
سیرسکي وايي د اپاچي، سوپر کوبرا او بلیک هاک هلیکوپټرې هم کولای شي چې د اوکراین په جګړه کې هم مهم رول ولوبوي.
د ۲۰۲۲ کال په فبرورۍ میاشت کې پر اوکراین د روسیې د یرغل له پیل راهیسې، کییف پر لویدیځو متحدینو فشار راوړی چې د زغره والو موټرو، ټانکونو، د اوږد واټن ویشتونکو توغندیو او F-16 جنګي الوتکو په ګډون ورته بیلابیلې پرمختللې وسلې او مهمات برابر کړي.
تمه کیږي چې لومړنۍ امریکايي F-16 جیټ الوتکې به په ۲۰۲۴ کال په وروستیو کې اوکراین ته ورسیږي، که څه هم د روسیې د قوي هوایي ځواک په پرتله کیدای شي په جګړه کې ددغو الوتکو اغیز محدود وي.
