هند د پاکستان تر ولکې لاندې کشمیر ته د بریتانیا د ډیپلوماټ پر سفر اعتراض کړی
هند د شنبې په ورځ ویلي چې د پاکستان تر ولکې لاندې کشمیر ته یې د یوه جګپوړي بریتانوي ډیپلوماټ د سفر په اړه خپل اعتراض وړاندې کړی او زیاته کړې یې ده چې دغه سفر «د هند له حاکمیت او ځمکنۍ بشپړتیا» څخه سرغړونه ده.
هند او پاکستان دواړه پر ټول کشمیر دعوه لري، خو دغه اټومي هیوادونه یوازې د کشمیر په یوه برخه حاکمیت کوي او له ۱۹۴۷ کال راهیسې د همالیا په دغه سیمه کې د دواړو هیوادونه ترمنځ دوه جګړې او ډیری نښتې شوې دي.
د هند د بهرنیو چارو وزارت په یوه اعلامیه کې ویلي، چې په پاکستان کې د بریتانیا عالي کمېشنر جین میریټ د جنورۍ په ۱۰ مه په داسې حال کې د پاکستان تر واک لاندې کشمیره لیدنه کړې چې د بریتانیا د بهرنیو چارو وزارت یوه چارواکي یې هم ملګرتیا کوله.
په اعلامیه کې راغلي چې د هند د بهرنیو چارو مرستیال وزیر وینای کواترا په هند کې د بریتانیا عالي کمیشنرۍ ته د دې سفر په اړه "سخت اعتراض" وړاندې کړی او دا سفر یې "د نه منلو وړ" بللی دی.
د بریتانیا د بهرنیو چارو وزارت یوه ویاند په دې اړه له نظر له څرګندولو ډډه کړې ده.
