په غزه کې د اسراییل په تازه هوايي بریدونو کې لسګونه کسان وژل شوي دي

د غزې د روغتیا وزارت اعلان وکړ، چې د غزې په مرکز کې یوازې له یوه روغتون څخه یې د ۵۶ تنو د مړینې خبر تر لاسه کړی دی. په ورته وخت کې د غزې په شمال کې د اسراییل په برید کې یو زیات شمېر کسان وژل شوي دي. اسراییل ویلي، چې د خان یونس په برید کې یې د حماس ۴۰ جنګیالي وژلي دي.

د اسراییل پوځ اعلان کړی، چې په تېرو ۲۴ ساعتونو کې یې د غزې تړانګې په شمال کې د حماس مرکزونه له هوا او سمندر څخه په نښه کړي دي.

د اسراییل قوماندانانو په وینا؛ د خان یونس په برید کې یې د «۴۰ تروریستانو» پر وژلو سربېره د حماس څو تونلونه او د مهماتو ډیپو هم موندلي دي.

د اسراییل پر جنوبي سیمو د حماس له ناڅاپي برید وروسته چې په ترڅ کې یې ۱۳۰۰ کسان ووژل شول، اسراییل پوځ په غزه کې پراخ عملیات پیل کړل.

د فلسطیني روغتیايي چارواکو په وینا؛ په دغو بریدونو کې تر ۲۲ زرو ډېر فلسطینیان چې ډېری یې ښځې او ماشومان دي، وژل شوي دي.

په ورته وخت کې د اسراییل پوځ د نهو نورو پوځیانو وژل کېدل تایید کړي دي. دغه عسکر چې عمرونه یې د ۱۹ او ۳۵ کلونو ترمنځ وو، د غزې په جنوبي او مرکزي سیمو کې د جګړو پر مهال وژل شوي دي.

د ټایمز اف اسراییل ورځپاڼې د راپور له مخې؛ په غزه کې د اسراییل د عملیاتو له پیل راهیسې ۱۸۵ اسراییلي پوځیان وژل شوي دي.