پر اوکراین د روسیې لسګونو بریدونو کې ۴ تنه وژل شوي او ۳۸ نور ټپیان دي
د اوکراینې رسنیو د رپوټ له مخې؛ روسیې د دوشنبې په سهار د اوکراین پر ښارونو او کلیو د بې پیلوټه الوتکو او توغندیو بریدونه کړي، چې څلور تنه یې ووژل او لږ تر لږه ۳۸ تنه یې ټپیان کړل.
د اوکراین پولیسو سیمه ییزو رسنیو ته ویلي، بریدونو په ختیځ کې د خارکیف، دنیپروپیتروسک او زاپوریزیا په سیمو او په لویدیځ کې په خمیلنیتسکي ښار کې د استوګنې ودانۍ او ښاري زیربناوې په نښه کړې.
په دغه بریدونو کې دوه کسان وژل شوي.
په همدې حال کې په دنیپروپیتروسک ولایت کې راکټي بریدونو کې یو تن وژل شوی او د څلورو ماشومانو په ګډون ۲۸ تنه ټپیان شوي دي.
بل خوا په خارکیف کې پر کورونو او د حرفوي زده کړو پر یوه مرکز د برید له امله یو کس وژل شوی او پنځه ملکي وګړي ټپیان شوي دي.
بل خوا په زاپوریزیا ښار کې هم په استوګنیزو ودانیو بریدونه شوي چې پنځه کسان پکې وژل شوي دي.
په دې وروستیو کې روسیې پر اوکراین خپلو بریدونو ته یو ځل بیا زور ورکړی او په دغه هېواد کې یې پراخې سیمې ویجاړي کړي او ګڼه مرګژوبله یې اړولې ده.
