د ایران پوله ساتو په تېرو ۹ میاشتو کې د خراسان رضوي پر پولو له ۴ ټنو ډېر نشه يي توکي نیولي
د ایران د خراسان رضوي ولایت د پوله ساتو ځواکونو قوماندان ویلي چې، د تایباد پوله ساتو ځواکونو د روان کال په ۹ میاشتو کې د دغه ولایت پر پولو څلور ټنه او ۲۵ کیلو ګرامه نشه يي توکي نیولي دي. تایباد، د افغانستان سره پر پولو د مشهد سوېل ختیځ په ۲۲۵ کیلو مترۍ کې پروت دی.
خراسان رضوي ولایت له شمال او شمال ختیځ څخه له ترکمنستان سره ۵۳۱ کیلو متره ګډه پوله لري او په ختیځ کې له افغانستان سره ۳۰۲ کیلو متره ګډه پوله لري.
مجید شجاع د یکشنبې په ورځ د (مرغومي ۱۷مه) ایرنا خبري اژانس ته وویل: « ۹۰۰ کیلو ګرامه نیول شوي مخدره توکي شیشه ده.»
د نوموړي په وینا د ایران په پولو کې د نشه يي توکو په نیولو کې زیاتوالی راغلی دی.
نوموړي زیاته کړه: «د تېر کال په همدې موده کې د نیول شویو نشه يي توکو اندازه څه ناڅه دوه ټنه او دوه سوه کيلو ګرامه وه او سږ کال دغه اندازه ٨٠ سلنه زياته شوې ده.»
د خراسان رضوي ولایت د پوله ساتو ځواکونو قوماندان وايي، د نشه يي توکو له قاچاق سره مبارزه د دغه ولايت د سرحدي ساتونکو له لومړيتوبونو څخه ده او پر پولو د قاچاق وړونکو د فعاليتونو د مخنيوي لپاره هوډمن دي.
