ترکيه کې ۱۶ کلن افغان « له پلار سره لانجه پسې کور ته اور اچولی او د خور د مړینې لامل شوی»
د ترکیې په مانیسای ښار کې یو افغان ځلموټي له خپل پلار سره تر لفظي شخړې وروسته خپل کور ته اور ورته کړی او د خپلې ۱۲ کلنې خور د مړینې لامل شوی. د ترکي رسنیو د راپورونو له مخې په دغه اور کې د دې کورنۍ درې نور غړي هم ټپيان شوي دي.
د مانیسا ښار سیمه ییزو رسنیو د شنبې په ورځ (د مرغومي ۱۶) خبر ورکړ، چې د پلار او زوی تر منځ تر لفظي شخړې وروسته دغه ځوان د خپلې ۱۲ کلنې خور کوټه په ګازو سره سوځولې ده.
ترکي رسنيو ويلي، چې طبې ډلو دغه پېغلوټې او درې نور ټپيان روغتون ته یووړل، خو له ټولو طبي امکاناتو او هڅو سره ـ سره نجلۍ خپل ژوند له لاسه ورکړ.
د راپورنو له مخې په لومړنيو بيانونو کې شکمن کس او د هغه مور او پلار د پېښې د رامنځ ته کېدو اصلي لامل پټ ساتلی و، خو تر پلټنو وروسته معلومه شوه، چې اور د دوی د ۱۶ کلن زوی کار و.
د ترکيې پوليسو ويلي، چې د دې ځوان او د هغه د مور او پلار د ناسمو څرګندونو له امله پلټنې پيل شوې دي.
د راپورونو له مخې دا پېښه نږدې میاشت مخکې د مانيسا ښار د ديني – هارماندالي کلي کې شوې.
د پېښي په اړه د ترکيې د پوليسو پلټني دوام لري او تر اوسه لا د پلار او زوی ترمنځ د لفظي شخړې اصلې انګېزه معلومه نه ده.
