په جاپان کې د زلزلې له امله د مړو شمېر له سلو واوښت او سلګونه لا هم لادرکه دي
په جاپان کې د نوي کال د ورځې د زلزلې له امله د مړو شمېر تر ۱۰۰ واوښت او تر ۲۰۰ ډېر کسان لا هم لا درکه دي. دغه زلزله په تېرو اتو کلونو کې په جاپان کې تر ټولو خونړۍ زلزله وه.
دغه زلزله د ریښتر په کچه د ۷.۶ درجې وه، چې د جاپان په لوېدیځ کې یې زیربناوې ویجاړې کړې او په هوکوریکو سیمه کې یې ۲۳۰۰۰ کورونه له برېښنا بې برخې کړل.
د کنډوالو لاندې د ژوندي پاتې شویو کسانو لټون د شپږمې ورځې لپاره هم دوام لري.
د سړکونو خرابوالی او نورې ستونزې د مرستو رسولو مخه نیولې ده.
