د ایران د کورنیو چارو وزیر: په کرمان کې د "ترهګریزو" چاودنو په تړاو ځیني کسان نیول شوي

د ایران د اسلامي جمهوریت د کورنیو چارو وزیر نن وویل، ځیني هغه کسان یې نیولي چې د کرمان ښار په چاودنو کې یې لاس درلود. ایسنا خبري اژانس د احمد وحیدي له قوله لیکي:«ډېرې ښې نښې موندل شوې او په دغو ترهګریزو پېښو کې ښکیل کسان نیول شوي دي.

ښاغلي وحیدي د نیول شویو کسانو په اړه نور معلومات ور نه کړل، خو ویې ویل «بشپړ معلومات به د کشفي ارګانونو له خوا اعلان شي.»

دغه ایراني چارواکي ویلي، چې دا مهال په کرمان کې د شوو چاودنو د څېړلو کار د استخباراتي ادارو په واک کې دی. هغه همدا راز ټینګار وکړ چې «د تروریستي رژیمونو لخوا ملاتړ شوي تروریستي خوځښتونو سره به په چټکۍ سره مقابله وشي.»