د غزې روغتیا وزارت: تر اوسه ۲۲ زره او ۴۳۸ فلسطینیان وژل شوي دي
د غزې د روغتیا وزارت چې د حماس د حکومت تر کنټرول لاندې فعالیت کوي، د پنجشنبې په ورځ اعلان وکړ چې د غزې د جګړې له پیل راهیسې ۲۲ زره او ۴۳۸ فلسطینیان وژل شوي دي. په تېرو ۲۴ ساعتونو کې ۱۲۵ تنه وژل شوي دي.
د دغه وزارت د شمېرو له مخې؛ په دې موده کې په غزه کې ۵۷ زره او ۶۱۴ کسان ټپیان شوي دي.
په غزه کې جګړه دوام لري او د اسراییل پوځ د پنجشنبې په ورځ اعلان وکړ، چې د غزې د تړانګې په مرکز او سویل کې یې خپل بریدونه زیات کړي دي.
همداراز، د غزې د روغتیا وزارت وایي چې په هغه برید کې چې اسراییل د پنجشنبې په ورځ د خان یونس په لویدیځ کې په المواسي کې کړی، د ۹ ماشومانو په ګډون ۱۴ کسان پکې وژل شوي دي.
د اکټوبر په اوومه د حماس له خوا پر اسراییلو په برید کې ۱۲۰۰ کسان، چې ډېری یې ولسي وګړي وو، ووژل شول.
د دغه برید په ترڅ کې حماس هم ۲۴۰ تنه یرغمل ونیول.
