د اوکراین ولسمشر وايي، د دغه هېواد په ختیځ کې روسي ځواکونو ته درانه زیانونه اوښتي دي

د اوکراین ولسمشر ویلي، چې د اودیوکا په محاصره شوې سیمه کې زرګونه روسي پوځیان وژل شوي دي. ولادیمیر زیلینسکي د دې ادعا لپاره شواهد نه دي وړاندې کړي؛ خو لویدیځ پوځي کارپوهان وايي، چې روسیې د اوکراین په ختیځ او جنوبي برخه کې د یوې وړې سیمې د کنټرول لپاره دروند قیمت ادا کړی دی.

ولادیمیر زیلینسکي چې تیره اونۍ د اوکراین په ختیځ کې د اودیکا سیمې ته تللی و، د اکانومیسټ مجلې ته وویل: "په زرګونو او په زرګونو روسي سرتېري وژل شوي او هیچا د دوی جسدونه هم نه دي راټول کړي."

روسي چارواکو تر اوسه د اوکراین د ولسمشر د څرګندونو په اړه څه نه دي ویلي.

کرملین وايي؛ لوېدیځ چارواکي په جګړه کې د روسیې د تلفاتو په اړه ډېر مبالغه کوي او د اوکراین تلفات کم بولي.
​