هند: پاکستان دې هغه ۱۸۴ کب نیونکي بندیان خوشې کړي چې د بند موده یې پوره شوې ده
هند له پاکستانه غوښتي؛ هغه ۱۸۴ کب نیونکي بندیان خوشې کړي چې د بند موده یې پوره شوې ده. د هندي رسنیو د راپور له مخې؛ دغه هېواد دا غوښتنه د ملکي بندیانو او کب نیوونکو د نوملړ د تبادلې په برخه کې چې هر کال ترسره کیږي کړې ده.
هند نن دوشنبه (د مرغومې ۱۱مه) له پاکستانه وغوښتل تر څو د دواړو هېوادونو له خوا د ملکي بندیانو او کب نیونکو د نوملړ د تبادلې په برخه کې چې تړون یې په ۲۰۰۸ کال کې شوی و او هر کال د جنوري او جولای په لومړۍ نېټه ترسره کیږي عملي کړي.
دا په داسې حال کې ده، چې اوسمهال د هند په بندخونو کې ۳۳۷ ملکيان او ۸۱ کب نیونکي پاکستانیان بندیان دي او د پاکستان په بندخونو کې بیا ۴۷ ملکي وګړي او ۱۸۴ کب نیونکي بندیان دي.
د راپورونو پربنسټ؛ له ۲۰۱۴ کال راهیسې د پاکستان له بندخونو څخه ۲۶۳۹ کب نیوونکي او ۶۷ ملکیان خوشې شوي دي.
د یادولو ده، چې دا دواړه هېوادونه تل د یو بل کب نیونکي په غیر قانوني توګه سمندري حدودو ته د ننوتلو په تور نیسي.
