په مالي کې د ملګرو ملتونو سوله ساتي ماموریت د خپلو ځواکونو ایستل بشپړ کړل
د ملګرو ملتونو په یوې اعلامیه کې راغلي، چې په مالي کې د ملګرو ملتونو سوله ساتی ماموریت د یکشنبې په ورځ له دغه هېواده د خپلو ځواکونو ایستل بشپړ کړل.
د رویټرز خبري اژانس د راپور له مخې؛ امنیتي کارپوهانو خبرداری ورکړی چې ښايي د مالي په شمال کې دغه سیمه به د ملګرو ملتونو د سوله ساتو ځواکونو له وتلو وروسته د جګړې په مرکز بدله شي، ځکه چې مالي پوځ او یاغی ډلې دواړه هڅه کوي، چې هغه سیمې ونیسي چې ملګري ملتونه پرېښي دي.
دا به د مالي لا ډېر بې ثباته کېدو لامل شي، چېرې چې د القاعدې او اسلامي دولت سره تړلي اسلامپالي وسله وال لا له مخه فعالیت کوي.
په مالي کې تاوتریخوالی د جون له میاشتې راهیسې وروسته له هغه مخ په ډېرېدو شو، چې جنتا پوځي ډلې په ۲۰۲۱ کال کې د یوې کودتا په پایله کې واک ترلاسه کړ؛ ملګرو ملتونو د نېږدې لس کلن سوله ساتي ماموریت ته یې له دغه هېواده د وتلو امر وکړ.
د دغه امر په غبرګون کې ملګرو ملتونو ویلي وو، چې یوه وړه ډله سوله ساتي ځواکونه به د دې سازمان د داراییو د انتقال تر بشپړېدو پورې په مالي کې پاتې شي؛ خو د ملګرو ملتونو مرستندویه ادارې به هلته د پخوا په څېر فعالې وي.
په مالي کې د ملګرو ملتونو سوله ساتې ماموریت په ۲۰۱۳ کې د بیلتون غوښتونکو یاغیانو له تاوتریخجن بغاوت وروسته پیل شو.
دغو یاغیانو هڅه کوله چې د دغه هېواد شمالي برخې تر کنټرول لاندې راولي او بیا د پوځ په مشرۍ کودتاه وکړي.
مالي له دغه وروسته د تاوتریخوالي پر مرکز بدل شو، چې وروسته بیا دغه تاوتریخوالی لویدیځې افریقا ته هم خپور شو او د ملیونونه کسانو د بې ځایه کېدو سبب شو.
