د غزې روغتیا وزارت: تېرو ۲۴ ساعتونو کې د اسراییل په بریدونو کې نږدې ۲۰۰ فلسطینیان وژل شوي

د غزې د روغتیا وزارت وایي، په تېرو ۲۴ ساعتونو کې د اسراییل په بریدونو کې ۱۹۵ فلسطینیان وژل شوي او ۳۲۵ کسان بیا ټپیان دي. وغتیایي چارواکو ویلي، په خان یونس کې یو روغتون ته نږدې په برید کې شل کسان وژل شوي دي.

په غزه کې د جګړې له پیل راهیسې تراوسه پورې ۲۱ زره او ۱۱۰ فلسطینیان وژل شوي او ۵۵ زره او ۲۴۳ کسان ټپیان شوي دي.
د غزې د روغتیا وزارت ویلي، دغه شل فلسطینیان د غزې د سوېل په خان یونس کې یوه روغتون ته څېرمه برید کې وژل شوي او پنځه نور کسان د غزې په مرکز المغازې سیمه کې یوه هوایي برید کې وژل شوي او د غزې له شماله هم د اوو تنو جسدونه الشفاء روغتون ته وړل شوي دي.
لاتراوسه د اسراییل پوځ په دې اړه څه نه دي ویلي.

تر دې وړاندې اسراییلي چارواکو ویلي وو، چې د غزې د روغتیا وزارت شمېرې نه مني او په وینا یې، د حماس جنګیالي هم په دغو وژل شویو کې شامل دي.
له حماس سره د اسراییل د جګړې له پیل وروسته، د ۸۲ ورځو په تېرېدو د دغه هېواد پوځ په غزه کې د خپلو عملیاتو پر مهال د تلفاتو د شمېرو له خپرولو ډډه کوي.
د اسراییل پوځ تېره ورځ راپور ورکړ، چې په غزه کې د عملیاتو پرمهال یې درې سرتېري ووژل شول، چې له دې سره د غزې په عملیاتو کې د اسراییلي سرتېرو د تلفاتو شمېره ۱۶۶ تنو ته لوړه شوه.