د امریکا د بهرنیو چارو وزیر له اوکراین سره د مرستو د بستې د اعلان خبر ورکړ

د امریکا د بهرنیو چارو وزیر انټوني بلېنکن وايي، چې حکومت یې له اوکراین سره د وسلو او تجهیزاتو د وروستۍ بستې اعلان کوي. نوموړي له کانګرس څخه غوښتي چې په دغه برخه کې د دوی ملاتړ وکړي.

نوموړي نن پنجشنبه (د مرغومې ۷مه) پر خپلې اېکس پاڼې لیکلي، چې دوی تېر کموالي ته په کتو له اوکراین سره د خپلو وسلو او تجهیزاتو د سږني کال د وروستۍ بستې اعلان کوي.

بلېنکن د کانګرس له غړو غوښتي چې د امریکا د دفاع او د ملي امنیت ګټو لپاره دې له دوی سره مرسته وکړي.

له دې وړاندې د امریکا د کانګرس غوڅ اکثریت غړو له اوکراین سره د مرستو مخالفت ښودلی و؛ خو ولسمشر بایډن ویلي وو، چې له اوکراین سره مرسته نه یوازې د اوکراین له خلکو دفاع ده؛ بلکې په اوږدمهال کې د امریکا له ګټو دفاع ده.

د اوکراین ولسمشر ولادیمیر زېلینسکي د لیندۍ په ۲۱ مه د خپل سفر په ترڅ کې د امریکا له ولسمشر جوبایډن او د دغه هېواد له چارواکو سره وکتل او له هغوی یې وغوښتل چې د روسیې د فشارونو پر وړاندې مقاومت وکړي او د کییف ملاتړ ته دوام ورکړي.

له دې سره امریکایي سناتورانو له زېلینسکي سره په لیدنه کې وویل، چې له اوکراین سره د امریکا د مرستو په تړاو باید حساب وشي.

ښاغلي زېلینسکي همدا راز هڅه وکړه، چې امریکايي سناتورانو ته ډاډ ورکړي چې د امریکا مرستې به د فاسدو موخو لپاره نه مصرفیږي.

په ورته وخت کې نوموړي تر اوسه له امریکا هم د مرستو د دوام او بندېدو غوڅ ځواب نه دی تر لاسه کړی؛ خو داسې ښکاري چې د امریکا د راتلونکو ټاکنو په موخه له اوکراین سره علاقه کمه شوې ده.