امریکا د هغو بریدونو ځواب ورکړ، چې په عراق کې یې له امله د دوی سرتېري ټپیان شوي وو
د امریکا متحده ایالاتو ویلي، د دوشنبې ورځې بریدونو ځواب یې ورکړی چې له امله یې په عراق کې د دوی سرتېري ټپیان شوي وو. پنټاګون ویلي، د دغه برید په غبرګون کې یې د حزب الله د کتایب او په عراق کې ورسره د نورو تړلو ډلو درې ځایونه په نښه کړي چې دغو ډلو ترېنه کار اخیست.
د امریکا ولسمشر جو بایدن، د عراق په اربېل کې پر امریکايي ځواکونو له برید وروسته پر ایراني پلوه ځواکونو د بالمثله برید امر وکړ.
د امریکا د پوځ مرکزي قوماندانۍ (سنتکام) په یوې وینا پاڼه کې کاږلي:« لومړنۍ ارزونې ښيي، د امریکا هوايي بریدونو هغه ودانۍ له منځه وړي چې په اغلب ګومان د حزب الله د کتایب ملیشې او ځواکونه په کې مېشت وو او هغوی یې وژلي دي.»
د سنتکام قوماندان مایکل کوریلا وویل:« دغه بریدونه د هغو عناصرو لپاره ځواب دی، چې په عراق او سوریه کې یې د ټلوالې پر ځواکونو د بریدونو مسولیت لاره او موخه یې د هغوی د ځواک اوبه کول او کمزوري کول دي. موږ تل له خپلو ځواکونو ساتنه کوو.»
سپینې ماڼۍ بیا په یوه بیان کې ویلي:« ولسمشر ته د هغو امریکایي ځواکونو ساتنه تر نورو ټولو هغو لومړیتوب لري، چې له ګواښ سره مخامخ دي. که چېرته دغه بریدونه دوام ولري، د امریکا متحده ایالات به د وخت او مهال سره سم ځواب ورکړي.»
د عراق په اربېل کې د دوشنبې په سهار پر امریکايي مرکز د بې پیلوټه الوتکې برید وشو، چې له امله یې د یوه ټپي شوي امریکايي سرتېري وضعیت نازک ښودل شوی.
امریکايي ځواکونو له دغه برید دیارلس ساعته وروسته ځوابي برید وکړ.
