د ملګرو ملتونو استازې: په غزه کې د اسراییل کړنې د سربرینیکا او روانډا ټول وژنې ته ورته دي
د فلسطین لپاره د ملګرو ملتونو ځانګړې استازې فرانسیسکا البانیس د دوشنبې په ورځ ویلي، چې په غزه کې د اسراییل کړنې د نړۍ په نورو برخو لکه سریبرینیکا او روانډا کې له وروستیو ټول وژنو سره ډېر توپیر نه لري.
البانیس په اېکس خواله رسنۍ کې په یو پیغام کې ویلي: "که تاسو د غزې وضعیت له نېږدې وګوری نو دا وضعیت د ملکي خلکو له نورو ټول وژنو سره توپیر نه لري. نسل وژنه یو پروسه ده، یو وار کېدونکی عمل نه دی. باید مخنیوی یې وشي. مګر په غزه کې لکه څنګه چې مخکې په سربرینیکا او روانډا کې شوي وو، نړۍ اجازه ورکوي چې دا ټول وژنه ترسره شي."
د سربرینیکا په ټولوژنه کې چې د ۱۹۹۵ کال په جولای میاشت کې رامنځته شوې وه، د بوسنیا د جګړې په جریان کې د سریبرینیکا په ښار او شاوخوا سیمو کې له ۸۰۰۰ ډېر بوسنیايي مسلمانان ووژل شوي وو.
د روانډا نسل وژنه بیا په کال ۱۹۹۴ کې رامنځته شوې وه، چې د اټکل له مخې له یو میلیون څخه ډېر خلک پکې وژل شوي وو.
پر اسراییل د اکټوبر په اوومه د حماس له برید وروسته چې ۱۲۰۰ کسان پکې ووژل شول، د اسراییل پوځ پر غزې پراخې بمبارۍ او ځمکني عملیات پیل کړل، ۲۰ زره او ۴۰۰ فلسطینیان یې ووژل او پراخې سیمې یې ویجاړې کړې.
