اسرایيلي پوځ وايي، په غزه کې د حماس په یو تونل کې د پنځو یرغملو کسانو مړي موندل شوي دي
د اسراییلو پوځ ویلي، چې د حماس په یو ویجاړ شوي تونل کې یې د پنځه یرغمل شویو کسانو مړي وروسته له هغه موندلي، چې دوی دغه تونلونو ته ننوتي دي.
په تونل کې د موندل شويو یرغملو هویت تثبیت شوی او جسدونه اسراییل ته لېږدول شوي دي. دغه پنځه یرغمل د روانې عیسوي میاشتې په پیل کې وژل شوي وو.
د اسراییل پوځ په وینا؛ دغه تونل د غزې په جبالیا سیمه کې وو، چې پکې د حماس یوه قرارګاه وه چې اوس ویجاړه شوې ده.
د پوځ په اعلامیه کې راغلي، چې په دې تونل کې وسلې، د وسلو جوړولو فابریکه او پټنځایونه موندل شوي دي.
