سي بي اېس: هغه اسراییلی چې مور پلار یې د حماس په برید کې وژل شوي سوله غواړي
په داسې حال کې چې د اسراییل او حماس ترمنځ جګړه روانه ده، د "سولې" کلمه کیدای شي د نه رسیدونکي موخې په څیر احساس شي. د ماوز انون لپاره، سوله یوازینۍ هیله ده.
د انون مور پلار دواړه د اکتوبر په اوومه د حماس وسله والو په برید کې له سلګونو نورو اسراییلیانو سره یوځای ووژل شول. د هغه مور، بلها، ۷۶ کلنه وه، او پلار یې یاکووي ۷۸ کلن و.
د انون په وینا دوی دواړه لا تر اوسه "د خپل ژوند په لومړنیو پړاوونو کې وو."
خو د اکتوبر په اوومه د دوی کور اور واخیست. امنیتي چارواکو ویلي وو چې په کور کې دوه جسدونه موندل شوي دي.
د دغه خبر له ترلاسه کولو وروسته، انون د یهودانو د شیوا د ناستې په دود اوه ورځې ماتم وکړ. انون وايي دغه برید هغه ویښ کړ.
د هغه د مور پلار تر وژل کیدو وروسته، انون د سولې او د جګړې د پای ته رسولو غوښتنه کړې. په دې موده کې د فلسطین د روغتیا وزارت په وینا، د اسراییل په بریدونو کې تر شل زرو ډېر فلسطینیانو وژل شوي دي.
انون وايي: "زه په کلکه باور لرم چې دا سیمه اسراییلو او فلسطینیانو دواړو ته ورکړل شوې ده. په غزه باندې پوځي یرغل به وضعیت نور هم خراب کړي، د وینو توییدو دغه سلسله به جاري وساتي، د مرګونو او تاوتریخوالي هغه سلسله چې له یوې پیړۍ راهیسې روانه ده. موږ باید دا طریقه ختمه کړو چې تاوتریخوالي ته په تاوتریخوالي ځواب ورکوو. مونږ باید بله طریقه خپله کړو، ځکه دغه څه چې اوس کوو له پیړیو راهیسې دوام لري او پایله یې نده بدله شوې."
انون، له ډیرو نورو اسراییلیانو سره یوځای د اکټوبر د اوومې نیټې له برید راهیسې د لومړي وزیر بنیامین نتانیاهو په وړاندې لاریونو کې برخه اخلي.
دغه لاریونونه د حماس له برید وروسته نږدې هره شپه ترسره کیږي. د یوې نوې ټولپوښتنې پایلې ښیې چې د اسراییل له دریمې برخې څخه لږ خلک نتانیاهو د دغې دندې لپاره مناسب بولي.
انون وايي: "هغه کسان چې د انتقام غوښتنه کوي زه ورته وایم چې څه به ترلاسه کړی؟ که موږ د حماس مشر ووژنو نو څه به وکړو؟ د هغه پر ځای به بل څوک وګومارل شي. خو که د حماس د مشر د وژلو پر مهال یو لس میاشتنی ماشوم یا اته کلن اسراییلی ماشوم هم ووژنو چې د حماس لخوا تښتول شوی و، بیا به څنګه شي؟ د هغه بدیل شته؟ نو موږ چا ته سزا ورکوو؟"
سره له دې چې ملګري ملتونه او نړیواله ټولنه له اسراییل بیا بیا د جګړې بندېدل غواړي، خو اسراییل د حماس د بشپړ له منځه وړلو خبره کوي.
د ملګرو ملتونو امنیت شورا د ډیسمبر پر اتمه په غزه کې د اوربند پرېکړه لیک وړاندې کړ، خو د امریکا د ویټو له امله ونه شو. دې شورا پرون له اوربند پرته غزې ته د مرستو زیاتولو پرېکړه لیک تصویب کړ.
خو جګړه په خپل زور روانه ده او پرون په غزه کې یوه ۷۶ کسیزه کورنۍ د اسراییل برید کې وژل شوې ده.
