نیویارک ټایمز: امریکا اسراییل ته تراوسه پورې له پنځو زرو ډېر بمونه ورکړي دي
نیویارک ټایمز راپور ورکړی، چې امریکا د تلې له ۱۵مې راهیسې تراوسه پورې له پنځو زرو زیات، اېم.کې-۸۴ دوه زریز پونډي بمونه اسراییل ته لېږلي دي. د دغو راپورونو له مخې پنټاګون اسراییل ته د وړو بمونو لېږد هم ډېر کړی، چې د غزې په څېر د ښارونو په نښه کولو له پاره یې وړتیا ډېره ده.
د نیویارک ټایمز د راپور له مخې، اسراییل د غزې جګړې په لومړیو شپږو اونیو کې د ولسي خلکو په سیمو ویجاړوونکي بمونه کارولي دي.
دغې امریکایۍ ورځپاڼې د دوه زریز پونډي بمونو نوم اخیستی، چې په جګړه کې اسراییل کارولي دي.
د اسراییل د پوځ ویاند د نیویارک ټایمز د هغې پوښتنې په ځواب کې چې د غزې په سوېل کې د دغو بمونو د کارولو په اړهکړې وه ویلي، چې د اسراییل لومړیتوب د حماس لمنځه وړل دي.
له دې سره امریکا په وار وار ټینګار کړی، چې اسراییل د حماس سره په جګړه کې د ولسي تلفاتو د کموالي لپاره باید ډېر پام وکړي.
