پر غزې د اسراییل د بریدونو له امله د وژل شویو کسانو شمېر له ۱۹ زرو څخه واوښت
د فلسطین د روغتیا وزارت د سې شنبې په ورځ وویل، چې د غزې په تړانګه کې د اسراییل د بریدونو له امله د اکټوبر له اوومې راهیسې د وژل شویو فلسطینیانو شمېره ۱۹ زره او ۶۶۷ کسانو ته لوړه شوې ده.
د دغه وزارت ویاند اشرف القدره زیاته کړې، چې د اسراییل په بریدونو کې ۵۲ زره او ۵۸۶ نور ټپیان شوي دي.
نوموړي یوه خبري کنفرانس ته وویل، چې د غزې په سویل کې روغتونونه نور د ټپیانو د ځای پرځای کولو توان نه لري.
القدره ویلي؛ ۹۹ طبي کارکوونکي په سختو شرایطو کې د اسراییل ځواکونو له خوا نیول شوي دي.
په بندیانو کې د الشفاء، الدوا او کمال عدوان روغتونونو مشران هم شامل دي.
د حماس په برید کې شاوخوا ۱۲۰۰ اسراییلیان وژل شوي او تر ۱۳۰ ډېر یرغمل دي.
