روسیې او اوکراین پر یو بل ګڼ شمېر د بې پیلوټه الوتکو بریدونه کړي دي
د اسوشییټیډ پریس خبري اژانس د راپور له مخې؛ روسیې او اوکراین د پرله پسې دویمې ورځې لپاره د یو بل پر سیمو د بې پیلوټه الوتکو بریدونه کړي، چې په یوه برید کې ظاهراً د روسیې پوځي هوايي اډه په نښه شوې ده.
د یکشنبې ورځ د روسیې د دفاع وزارت د ټیلیګرام په یو پیغام کې ویلي چې لږترلږه ۳۵ اوکرایني بې پیلوټه الوتکې یې تېره شپه د روسیې په جنوب لویدیځ کې په درېیو سیمو کې رانسکورې کړې دي.
د روسي چارواکو په وینا؛ د دغو بریدونو په لړ کې د روسیې یوه هوايي اډه چې د اوکراین په جګړه کې کاریدونکې جیټ الوتکې پکې میشتې دي، هم په نښه شوې ده.
د روسیې د روستوف ولایت والي واسیلي ګولوبیف په جلا توګه موروزوفسک او یو بل ښار کې د اوکراین له لوري د ډله ییزو بې پیلوټه الوتکو بریدونو خبر ورکړی.
هغه ویلي چې ډېری بې پیلوټه الوتکې رانسکورې شوي او کومه مرګ ژوبله یې نه ده اړولې؛ خو د مالي زیانونه په اړه یې څه نه دي ویلي.
اوکراین د دغه بریدونو په اړه په رسمي توګه څه نه دي ویلي؛ خو اوکرایني رسنیو د پوځي سرچینو په حواله لیکي، چې د اوکراین پوځ او استخباراتو د مورزوفسک په هوايي اډه برید کړی او پوځي تجهیزاتو ته یې د پام وړ زیانونه وراړولي دي.
د شنبې په ورځ د اوکراین ولسمشر ولادیمیر زېلانسکي خپل ولس ته په وینا کې ویلي وو، چې دا اونۍ یې پوځ د روسیې له خوا کاریدونکې ۱۰۴ بې پیلوټه الوتکې ویجاړې کړې دي.
