زیلانسکي: په یوه اونۍ کې مو د روسیې له ۱۱۲ بې پیلوټه الوتکو نه ۱۰۴ ویجاړې کړې
د اوکراین ولسمشر ولادیمیر زیلانسکي خپل ولس ته په وینا کې ویلي چې دا اونۍ یې پوځ د روسیې لخوا کاریدونکې شهید نومو ۱۱۲ بې پیلوټه الوتکو له ډلې یې ۱۰۴ ویجاړې کړې دي.
هغه په خپله وینان کې ویلي:”زه غواړم زموږ د اسمان د مدافعینو ستاینه وکړم: دوی یوازې په یوه شپه کې ۳۰ شهید نومې بې پیلوټه الوتکې ویجاړې کړې. په ټوله کې، د روسیې لخوا له کارول شويو ۱۱۲ بې پیلوټه الوتکو څخه ۱۰۴ په دې اونۍ کې ویجاړ شوې دي.“
نوموړي تینګار کړی چې د روسیې هره ویجاړه شوې بې پیلوټه الوتکه د ژوند ژغورلو او د زیربناوو د خوندي کولو مانا لري.
هغه ویلي چې اوکراین ته د دوی د متحدینو لخوا ورکړل شوي دفاعي سیسټمونه ډېر ښه کار کوي.
زیلانسکي ويلي چې د هوايي دفاعي سیسټموونو د لا پیاوړتیا لپاره کار کوي او دا چې په دې اړه د نړۍ له مشرانو سره موافقې ته رسیدلي دي او په دې برخه کې به له اوکراین سره مرسته وشي.
هغه دغه راز ویلي چې د وسلو په برخه کې یې شکایتونه اوریدلي او د نوو وسلو د تولید او د وسلو د ترمیم په اړه یې خپلو متحدینو سره خبرې کړي او په دې برخه کې به ستونزې حل شي.
هغه ویلي چې موخه یې دا ده چې د اوکراین ځواک لا ډېر شي او هره میاشت دفاعي وړتیا باید لا پراخه شي.
