اسراییلي یرغمل چې په غلطۍ د دغه هیواد پوځیانو وژلي، سپین بیرغونه یې په لاس کې وو
د شنبې په ورځ په خپرو شوو لومړنیو څیړنو کې راغلي چې، درې اسراییلي یرغمل چې د اسرايیل د پوځ له خوا په غلطۍ په غزه کې وژل شوي، سپین بیرغونه یې په لاس کې وو. دا پېښه پرون په غزه کې شوې چې پکې د حماس وسله وال د اسراییل له پوځ سره په سخته جګړه کې ښکیل دي.
د اسراییل یو پوځي چارواکي د شنبې په ورځ رویټرز خبري اژانس ته ویلي، چې دغه درې یرغمل بې کمیسه ولاړ وو او هر یو یې په لاس کې یو سپین بیرغ په لاس کې نیولی وو.
کله چې اسراییلي سرتیرو دغه یرغمل ولیدل، د اسراییلي رسنیو په وینا د تهدید احساس یې وکړ او پر هغوی یې ډزې وکړې، چې دوه یرغمل سملاسي ووژل شول او دریم یې ټپي شو چې په عبراني ژبه یې د مرستې غوښتنه کوله.
دغه چارواکي ویلي،”سملاسي د کنډک قوماندان د اوربند امر صادروي، خو بیا د دریم کس پر لور نورې ډزې وشوې او هغه هم ووژل شو.“
د اسراییل لومړي وزیر بنیامین نتنیاهو د جمعې په ورځ دا پیښه "د نه زغملو تراژیدي" بللې ده.
نتنیاهو په اکس خواله رسنۍ یو پیغام کې لیکلي: "زه د اسراییل له ټولو خلکو سره یوځای د دغه ژور غم لپاره خپل سر ټیټوم." "ټول اسراییل نن د دغو کسانو په وژل کیدو غمجن دي."
درې وژل شوي یرغمل الون شمریز، سمر الطلقا او یوتم حمیم دي، چې د اکتوبر په اوومه پر اسراییل د حماس د برید په لړ کې تښتول شوي وو.
په دغه برید کې۱۲۰۰ کسان وژل شوي او ۲۴۰ کسان د حماس له خوا یرغمل شوي وو چې له سلو زیات کسان لا هم په غزه کې د حماس په بند کې دي.
د اسراییل د پوځ لخوا په غلطۍ د یرغملو د وژل کیدو تر اعلان وروسته، د اسراییل په تل ابیب ښار پراخ لاریونونه شوي دي.
