د پاکستان پخوانی لومړی وزیر عمران خان د بندو دروازو تر شا محاکمه کېږي
د پاکستان د پخواني لومړي وزیر او د تحریک انصاف ګوند د مشر وکیل وايي، د عمران خان محاکمه به د تړلو دروازه تر شا وشي. نعیم پنجوته خپل اېکس کې نن د محکمې پر دې پرېکړه نیوکه کوي او زیاتوي: «د ښاغلي خان د محاکمې پر مهال به رسنۍ هم نه وي، نو دا کوم ډول انصاف دی؟»
وکیلان او د انساني حقونو ډلې وايي، د تړلو دروازوتر شا محاکمه د منصفانه پرېکړې اړتیاوې نه پوره کوي.
نننۍ پرمختیا یوه ورځ مخکې ښاغلی خان د حکومتي رازونو په ښکاره کولو تورن شو او راتلونکو ټاکنو کې یې د ګډون چانس له لاسه ور کړ.
دغه تورونه د هغه تلګرام اړوند دي چې په واشنګټن کې د پاکستان سفیر اسلام اباد ته لېږلي او ښاغلی خان یې په عامولو تورن دی.
خو عمران خان وايي، د نورو سرچینو له لارې دا سند تر رسنیو رسېدلی او هغوی ولس پرې خبر کړی دی.
که عمران خان په دې تور کې پړ وبلل شي، نو تر لس کاله بند سزا سره مخ کېدلی شي.
