حوثیانو په سره سمندرګي کې بېړیو ته خبرداری ورکړ چې د اسراییل او فلسطین خاورې ته نږدې نه شي
د یمن حوثیانو په سره سمندرګي کې بېړیو ته خبرداری ورکړی، چې د فلسطین او اسراییل خاورې ته له نږدې کېدو ډډه وکړي. دغه غورځنګ د دوشنبې په ورځ د ناروې په یوې کښتۍ د توغندیز برید مسوولیت په غاړه واخیست.
د یمن حوثیانو همدارنګه له بېړیو غوښتي، چې د هغوی پوښتنو ته د سملاسي ځواب لپاره خپلې ارتباطي راډیوګانې روښانه وساتي.
العربیه رسنۍ د یوه امریکایي چارواکي له قوله راپور ورکړی، چې واشنګټن د بېړیو د خوندیتوب لپاره د یوې پوځي ډلې د جوړوو لپاره لږ تر لږه له دوولسو هېوادونو سره د سلامشورو په حال کې دی.
تر دې وړاندې هم د یمن حوثیانو خبرداری ورکړی و، چې هر ډول کښتۍ چې د اسراییل په لور حرکت وکړي د دوی تر برید لاندې به راشي.
په تېرو اونیو کې د یمن حوثیانو په سور سمندرګي کې پر څو کښتیو برید کړی او د برېتانیا يوه کښتۍ یې هم نیولې وه.
