اوچا: قبرس له افغانستان سره د څه باندې ۹۸ زره یورو مرسته کوي
د ملګرو ملتونو د بشردوستانه مرستو همغږي کوونکي دفتر (اوچا) نن چهارشنبې (د لیندۍ ۲۲مه) پر خپلې اېکس پاڼې له افغانستان سره د قبرس د ۹۸ زره او ۴۶۱ یورو مرستو خبر ورکړ او زیاته یې کړه چې دغه هېواد له ۲۰۲۱ کال راهیسې له افغانستان سره د ۱۷۷ زره یورو مرسته کړې ده.
له افغانستان سره دغه مرستې په داسې حال کې کیږي، چې دغه اداره اړمنو کسانو ته د مرستو د رسولو په برخه کې د افغانستان په ګډون د یو شمېر هېوادونو لپاره ۴۶،۴ میلیارد ډالرو ته اړتیا لري.
اوچا تر دې وړاندې ویلي وو، دغه اداره په ۲۰۲۴ کال کې یوازې د افغانستان له اړمنو کسانو سره د مرستې لپاره شاوخوا درې میلیارده ډالرو ته اړتیا لري.
د راپورونو له مخې؛ په افغانستان کې څه باندې ۲۹ میلیونه کسان بېړنیو بشردوستانه مرستو ته اړتیا لري او دغه هېواد د نړۍ د هغو پنځو هېوادونو په ډله کې دی، چې وګړي یې تر ټولو ډېرو بشري مرستو ته اړمن دي.
د هرات ولایت خونړۍ زلزلې، سخت ژمی، د افغانستان د خلکو ناسم اقتصادي وضعیت او همداراز له ګاونډیو هېوادونو څخه په جبري توګه د زرګونو افغانانو اېستل د دې لامل شوی چې د نړۍوالو بشري مرستو ته اړتیا زیاته شي.
دغه راز نړۍوالو مرستندويه ادارو په ځلونو د بودیجې د کمښت او د دغو بنسټونو له کارکوونکو سره د طالبانو د نامناسب چلند له امله د خپلو فعاليتونو د کمولو خبردارى ورکړى و او ویلي وو، چې دا کار به اړتياوې زياتې کړي.
د راپورونو له مخې؛ د ښځو پر کار او فعالیتونو بندیزونه، د نړۍوالو بنسټونو پر کارونو محدودیتونه او په افغانستان کې کړکېچونه د دې لامل شوي، چې په دغه هېواد کې بیوزلي او وزګارتیا اوج ته ورسېږي.
تېره ورځ د ملګرو ملتونو د کرنې او خوړو پروګرام هم په خپل تازه راپور کې ویلي وو، چې افغانستان یو له هغو هېوادونو دی، چې خلک یې د خوړو له کمښت سره مخ دي.
