ډېره اسماعيل خان کې پر یوې امنیتي ودانۍ ځانمرګي برید لږ تر لږه ۱۹ سرتېرو ته مرګژوبله اړولې
د خيبرپښتونخوا په سوېل کې د ډېره اسماعيل خان ولسوالۍ په درابن سيمه کې يوې امنيتي ودانۍ ته د يوه چاودېدونکو توکو ډک موټر له ننوتلو وروسته زوروره چاودنه شوې، چې په پایله کې يې امنيتي ځواکونو او پوليسو ته مرګ ژوبله اړولې ده.
دغه مرکز د یوه ښوونځي دننه جوړ شوی و، چې د چاودنې په پایله کې یې ودانۍ له څېرمه نړېدلې ده.
چاودنه هغه مهال وشوه، چې له چاودېدونکو توکو ډک موټر د دغې ودانۍ مخې ته چاودنه وکړه.
سرچینې منلې، چې په دې سیمه کې ګڼ شمېر پوځیان اوسېدل.
د ډېره اسماعيل خان يوه امنيتي چارواکي وويل:« لومړنۍ شمېرې ښیي، چې په چاودنه کې درې تنه پولیس وژل شوي او ۱۶ نور ټپيان شوي دي.»
د پوځ په وینا، له چاودنې وروسته هم په سیمه کې جګړه روانه وه چې په پایله کې یې لږ تر لږه اووه تنه وسلهوال مخالفین وژل شوي دي.
په سیمه کې ازاد خبریال رفعت الله ورکزی وایي، چې د بریدګرو د لمنځه وړلو لپاره له ډرون او چورلکو هم کار اخیستل شوی و.
تحريک جهاد پاکستان د دغه بريد پړه منلې ده.
د دغې ډلې ویاند ملا قاسم د افغانستان انټرنشنل خبریال ته ویلي، چې دغه برید د مولوي حسن ګنډاپور لهخوا ترسره شوی دی.
د نوموړي په وینا؛ په دغه برید کې لږ تر لږه ۱۶ عسکر وژل شوي دي.
تحریک جهاد پاکستان یوه ناپېژانده ډله ده، چې د پاکستاني پوځ په ګومان دغه ډله هم د ټيټيپي ډلې سره تړاو لري او په بېلابېلو نومونو بریدونه ترسره کوي.
