اوکراین سره د امریکا د مرستو له ځڼډېدو وروسته زېلنسکي د امریکا په سفر تللی
د اوکراین ولسمشر ولادیمیر زېلینسکي د امریکا له ولسمشر جو بایډن سره د لیدو لپاره سپینې ماڼۍ ته رسېدلی دی او تمه کیږي چې بایډن او زېلنسکي به د اوکراین د جګړې په اوسني وضعیت او له اوکراین څخه د امریکا او د هغوی د متحدینو د ملاتړ په کچې خبرې وکړي.
ویل کیږي د خبرو اترو وروسته به بایډن او زېلینسکي په یو ګډ خبري کنفرانس کې د لیدنو د جزییاتو په اړه خبرې وکړي.
نوموړي نن سهار د امریکا د کانګرس له جمهوري غوښتونکو او ډېمکراتو غړو سره په اوکراین کې د روان وضعیت په اړه خبرې کړې وې.
تېره اونۍ د اوکراین لومړۍ میرمن اولینا زېلنسکي له اوکراین سره د امریکا د مرستو د ځڼډېدو په غبرګون ویلي وو، که نړۍ له دوی سره مرستې ونه کړي، دوی به د مرګ له ګواښ سره مخامخ شي.
تر دې وړاندې سپینې ماڼۍ ویلي وو؛ د کانګرس سره د خبرو اترو د ځنډېدو له امله نه شي کولی اوکراین ته ډاډ ورکړي، چې متحده ایالات به نورې امنیتي مرستې ورسره وکړي که نه.
امریکا د ۲۰۲۲ کال د فیبرورۍ میاشت کې پر اوکراین د روسیې له یرغل راهیسې له دغه هېواد سره ۱۱۱ میلیارده ډالر مرسته کړې ده.
جمهوري غوښتونکي بهرنیو هېوادونو سره د متحده ایالاتو د میلیاردونو ډالرو مرستې ستړي شوي دي او دوی له اوکراین او اسراییل سره د اضافي مرستو د تصویب لپاره رایه اچونې د سرحدونو په برخه کې د امریکا په پالیسۍ کې د بدلون شرط ایښی دی.
