د ملګرو ملتونو چارواکي: طالبان د نجونو پر تعلیم د بندیز په اړه هم نظره نه دي

د افغانستان لپاره د ملګرو ملتونو د بشري حقونو راپور ورکوونکي ریچارډ بېنېټ د یکشنبې په ورځ د دوحې د فورم په غونډه کې وویل، چې طالبان یو متحد نظر لري؛ خو د ښځو د تعلیم په برخه کې سره وېشل شوي دي.

د هغه په ​​وينا؛ د طالبانو د لوړو زده کړو يو پخوانى وزير د ښځو د زده کړو د ملاتړ په تور له دندې ګوښه شوى دى.

ښاغلي بېنېټ د طالبانو د ګوښه شوي چارواکي نوم وانه خیست؛ د لوړو زده کړو اوسنی وزیر ندا محمد ندیم چې د طالبانو له سخت دریځو څخه ګڼل کېږي ترې وړاندې عبدالباقي حقاني د دغه وزارت مشر و.

حقاني د ۱۴۰۰ کال د سنبلې په ٢١مه ويلي وو، چې نجونې د زده کړې حق لري؛ خو بايد په جلا يا غير مخلوط ټولګي کې زده کړې وکړي.

ښاغلي بېنېټ د یکشنبې په ورځ د دوحې د فورم په غونډه کې خبرې کولې، چې یوه موضوع یې د افغان نجونو تعلیم و.

هغه هلته د طالبانو د اختلاف په اړه وویل: "د طالبانو یووالی د دوی یو ځواک دی، ځکه چې دوی یووالی خورا بنسټیز ګڼي.مګر د نجونو د زده کړو په برخه کې زه فکر نه کوم چې دوی دا یووالی ولري.موږ دا توپیر په ځینو بیانونو کې لیدلی دی."

هغه د طالبانو د لوړو زده کړو له پخواني وزير سره د خپلې ليدنې په اړه وويل، چې دغه چارواکي په پوهنتون کې د نجونو لپاره په جلا ټولګيو کې د زده کړو د زمينې د برابرولو خبره کوله.

بینیټ وویل: "موږ د ښځو او نجونو د زده کړو په اړه مفصلې تخنیکي خبرې وکړې. هغه دا نه ویل چې نجونې دې پوهنتون ته نه ځي. بلکه؛ هغه وویل چې څنګه په جلا ځای کې نجونې او میرمنې زده کړې وکړي."

خو د ملګرو ملتونو د بشري حقونو د راپور ورکوونکي په وينا؛ د طالبانو دغه وزير څو مياشتې وروسته له خپلې دندې لرې شو.

طالبانو اعلان کړی، چې د دې ډلې د شریعت له تفسیر سره سم تر اوسه د نجونو او ښځو لپاره ښوونځیو او پوهنتونونو ته د تګ لازم شرایط نه دي برابر شوي.

دې ډلې د ښوونځیو او پوهنتونونو د بیا پرانستلو لپاره مهال ویش هم نه دی وړاندې کړی.