د فرانسوي ښوونکي د سر پرې کولو په قضیه کې شپږ تنکي ځوانان په بند محکوم شول
د فرانسې یوې محکمې د جمعې په ورځ د ( لیندۍ ۱۷ مه ) شپږ تنکي ځوانان د فرانسوي ښوونکي سامويل پتي په وژنه کې د "تاوتریخوالي د هڅولو لپاره د جنایي دسیسې" په تور محکوم کړل. په ۲۰۲۰ کال کې یوه چیچنیايي کډوال له دغه ښوونکي په دې سبب سر پرې کړ چې د اسلام د پېغمبر کارېکاتور یې ښودلی و.
په هغه وخت کې له محکوم شوو شپږو تنکیو ځوانانو یوه یې دیارلس کلنه نجلۍ وه او د " ناسمو معلوماتو" په تور محکومه شوې وه.
دغې نجلۍ ویلي چې فرانسوي ښوونکي له مسلمانو زدکوونکو وغوښتل چې د کاریکاتورونو له ښودلو مخکې له ټولګي ووځي.
دا په داسې حال کې ده چې دا نجلۍ اساسا په هغه وخت کې په ټولګي کې نه وه او محکمې هغه د سامويل پتي په وړاندې د "دروغ" ویلو او هغه ته د سپکاوي په تور محکومه کړه.
دغه نجلۍ په دې پېښه کې د خپل رول له امله په ۱۸ میاشتو تعلیقي بند محکومه شوې ده.
داسې ښکاري چې کله دا چیچنیايي ځوان د فرانسوي ښوونکي د وژلو لپاره راغی، هغه له دغو پنځو کسانو څخه وپوښتل چې "معلم څوک دی" او دوی سامويل پتي وښود.
دغو پنځو کسانو ویلي دي چې دوی فکر نه کاوه چې دا به د ښاغلي پتي د مرګ لامل شي.
له دغو ځوانانو يو يې اوس په شپږو مياشتو بند او څلور نور يې په تعليقي بند محکوم شوي دي.
دغه شپږ کسان د رسنیو له حضور پرته د ځوانانو په محکمه کې د تړلو دروازو تر شا محاکمه شول.
عبدالله انزوروف د تاریخ د مضمون د ښوونکي ۴۷ کلن سامويل پتي له پیژندلو وروسته د پاریس څنډو ته له هغې لېسې سره نږدې سر ترې پرې کړ چې ده پکې درس ور کاوه.
په دې لړ کې د فرانسې د جرمونو ځانګړې محکمه د دې موضوع په تړاو د اتو بالغو کسانو دوسیې څېړي.
یو له دغو کسانو د یوې محکومې شوې نجلۍ پلار دی چې په ټولنیزو رسنیو کې د سامويل پتي د پارونکو ویډیوګانو په خپرولو تورن دی.
