په پاکستان کې پر یوه مسافر وړونکي بس برید نهه تنه وژلي او ۲۵ نور یې ټپیان کړي دي
پاکستاني رسنیو د دغه هېواد د چارواکو په حواله خبر ورکړی، چې د ګلګېت-بلتستان په چیلاس سیمه کې پر یوه مسافر وړونکي بس د «ترهګرو» په برید کې نهه تنه وژل شوي او ۲۵ نور ټپیان شوي دي. د چارواکو په وینا، دغه بس تر برید سملاسي وروسته له یوې لارۍ سره ټکر شوی دی.
دغه برید چې د شنبې په ورځ د اکټوبر په ۱۱ مه سهار شاوخوا شپږ بجې شوی، پاکستاني چارواکو غندلی دی.
د پوليسو په وينا، په دغه بس کې دوه پاکستاني پوځيان هم وژل شوي دي.
سره له دې چې تر اوسه پورې کومې ډلې د دې برید مسوولیت نه دی منلی، خو تر دې وړاندې د پاکستان تحریک طالبان او بلوچ آزادي غوښتونکو د یو شمېر وسله والو بریدونو مسوولیت پر غاړه اخیستې و.
پاکستاني چارواکي په دې باور دي چې په افغانستان کې د طالبانو له واک ته رسېدو وروسته په پاکستان کې ترهګریز بریدونه زیات شوي دي.
