ملګري ملتونه: د غزې پر سویل د اسراییل د بریدونو له امله یو میلیون کسان کډوالۍ ته اړ کېږي
د فلسطین لپاره د ملګرو ملتونو د کډوالو ادارې مشر خبرداری ورکړی چې د غزې تړانګې په سویل کې د اسراییل بریدونه یو میلیون فلسطینی کډوال د مصر پولو ته ټیل وهلی شي.
فیلیپ لازارینی برتانوۍ ورځپانې ګارډین سره په مرکه کې ویلي: "که جګړه دوام وکړي دا احتمال ډېرېږي چې فلسطینیان به د سویل لور ته، حتا د پولې هغې غاړې ته تللو ته اړ شي."
نوموړي زیاته کړې: "موږ یو میلیون کډوال لرو ، د ملګرو ملتونو په تاسیساتو کې یو میلیون کډوال لرو چې یو لک یې په شمالي غزه کې دي."
هغه دغه څرګندونې په غزه کې د یوې اونۍ موقتي اوربند له ماتیدو وروسته کړې دي.
د غزې د روغتیايي چارواکو په وینا، له جمعې ورځې راهیسې د اسراییل په هوايي بریدونو کې لږ تر لږه ۱۹۳ فلسطینیان وژل شوي او ۶۵۲ نور ټپیان دي.
اسراییل د اکټوبر په اوومه د حماس لخوا د پولې په اوږدو کې له برید وروسته پر غزې پراخ هوايي او ځمکني بریدونه پیل کړل.
له هغه وخت راهیسې د اسراییل په بریدونو کې د ۶۱۵۰ ماشومانو او څلور زره ښځو په ګډون تر ۱۵ زره زیات فلسطینیان وژل شوي دي.
