د پاکستان امنیتي ځواکونو مردان کې «تر ټولو مهم وسلوال» ونیو
د پاکستان امنیتي ځواکونه وايي، د پښتونخوا په مردان کې یې د تحریک طالبان پاکستان «تر ټولو مهم غړی»نیولی دی. د پاکستان دولتي رادیو د شنبې ورځې د راپور له مخې، «دغه ترهګرو په راتلونکو ورځو کې په پېښور کې د لویو بریدونو پلان درلود.»
ویل کېږي نوموړي د پلټنو پر مهال مهم معلومات امنیتي ځواکونو ته ور کړي او له مخې یې په خیبر ولسوالۍ کې مهمات او داسې باروت موندل شوي چې په ځانمرګو واسکټونو کې کارېږي.
په راپور کې دا نه دي راغلي چې دا کس کله نیول شوی او د نیولو پر مهال له امنیتي ځواکونو سره کوم مقاومت هم شوی که نه.
د پاکستان پوځ د تېر نومبر پر ۱۶ هم د پېښور په بډه بېره کې د تحریک طالبان پاکستان د پنځو وسلوالو د وژلو خبره کړې وه او دې ډلې هم د خپلو غړو وژل کېدل منلي و.
