د عمران خان ګوند د راتلونکو ټاکنو لپاره سرپرست مشر وټاکه
د پاکستان د پخواني لومړي وزیر عمران خان په مشرۍ تحریک انصاف ګوند، نن وکیل ګوهر علي خان د راتلونکو ټاکنو لپاره د ګوند سرپرست مشر وټاکه. دا چې عمران خان په بند کې دی او په ټاکنو کې له ګډون منع شوی، نو له نوي سرپرست سره به یې ګوند په ټول ټاکنو کې ولوبېږي.
د رویټرز د راپور له مخې، پخپله عمران خان وکیل ګوهر علي خان د ګوند د نوي مشر په توګه ټاکلی دی.
وکیل ګوهر علي خان پښتون او د پښتونخوا د بونېر اوسېدونکی دی.
د پاکستان ټاکنو کمېسون له تحریک انصاف ګوند غوښتي و چې د نوي مشر لپاره رایه ور کړي او که غواړي چې د فبرورۍ پر اتمه ټاکنو کې ګډون وکړي، خپل ټاکنیز سمبول بېټ ساتلی شي.
تحریک انصاف ګوند به راتلونکو ټاکنو کې د پخواني لومړي وزیر نواز شریف په مشرۍ د مسلم لیګ نواز ډلې سره سیالي کوی، خو که د عمران خان ګوند ټاکنې وګټي، د لومړي وزیر په توګه د ګوهر علي خان ټاکل کېدل لازمي نه دي.
د عمران خان بل وکیل ظفر علي خان د ګوهر علی خان غوره کېدل د مېلمستیا د خوندیتوب لپاره د ماشوم ګومارلو سره پرتله کوي.
۷۱ کلن عمران خان چې د ۲۰۲۲ کال اپرېل کې له لومړي وزارت لرې کړل شوی، تراوسه په سیاسي او حقوقي جنجالونو کې ګیر دی.
نوموړی تېر اګسټ کې د دریو کلونو لپاره جېل ته له تلو راهیسې په عامه محضر کې نه دی لیدل شوی.
عمران خان تورن دی چې له ۲۰۱۸ تر ۲۰۲۲ کال یې د لومړي وزارت پر مهال ترلاسه شوې ډالۍ بې قانونه پلورلې دي.
خان او د ګوند مرستیال یې شاه محمود قریشي د پټو حکومتي رازونو د بربنډولو له امله هم له دوسیې سره مخ دي، خو نوموړی دا ټول تورونه ردوي.
