د سعودي د پانګونې صندوق د لندن د هیټرو هوايي ډګر ۱۰ سلنه ونډه اخیستې
له ۱۷ کلونو وروسته هسپانوي شرکت «فروویال» د هیټرو په هوايي ډګر کې خپله۱۰ سلنه ونډه د یو میلیارد پونډو په بدل کې د سعودي پانګونې صندوق ته وپلورله. د لندن هیټرو هوایي ډګر د نړۍ یو د هغو هوایي ډګرونو څخه دی چې ګڼه ګوڼه پکې ډېره ده او هیټرو د بریتانیا تر ټولو لوی هوایي ډګر هم دی.
د "فروویال" شرکت اعلان کړی، چې د ۳ میلیاردو ډالرو په ارزښت یې ۲۵ سلنه سهمونه ورکړي.
۱۵ سلنه نور یې د اردیان په نوم یوې فرانسوي خصوصي شرکت ته پلورلي دي.
د سعودي د پانګونې صندوق اعلان وکړ، چې خوښ دی د هیټرو په هوايي ډګر کې چې ستراتیژیک او نړۍوال موقعیت لري د پانګونې فرصت لري.
د دغه هوایي ډګر ۲۰ سلنه ونډه د قطر د پانګونې سازمان سره ده او تمه ده چې دا هوایي ډګر به په راتلونکې کې د دغه سازمان لخوا رهبري شي.
پر قطر او سعودي سربېره، د سنګاپور د پانګونې صندق، د استرالیا د تقاعد صندق او دوه چینايي او کاناډايي شرکتونه هم په دې هوایي ډګر کې ونډه لري.
د ۲۰۲۳ میلادي کال لپاره په هیټرو کې د هر مسافر اوسط لګښت شاو خوا ۳۱.۵۰ یورو دی، خو ویل کیږي چې دا اندازه به په ۲۰۲۴ میلادي کال کې۲۵.۴۳ ته راښکته شي او د ۲۰۲۶ میلادي کال تر پایه به په پراخه کچه ثابت پاتې شي.
