لاهور او کراچۍ د نړۍ تر ټولو ککړو ښارونو د ډلبندۍ په سر کې راغلل
د لاهور او کراچۍ هوا د سه شنبې په شپه خطرناکې او خورا ککړې کچې ته د رسېدو سره د نړۍ تر ټولو ککړو ښارونو په نوملړ کې سر ته راغلل. که څه هم چې د پاکستان لوی ښارونه د تېرې اونۍ په اوږدو کې د نړۍ په پنځو ککړو ښارونو کې پاتې شوي وو؛ خو د لومړي ځل لپاره یې لومړی او دویم مقام خپل کړ.
د هند پلازمېنه ډیلی درېیم او کلکته پنځم تر ټولو ککړ ښارونه شول.
روغتیایي کارپوهانو د هوا د ککړتیا له امله پېښېدونکو ګواښونو د مخنیوي لپاره د اړینو اقداماتو سپارښتنه کړې:« په غیر ضروري توګه بهر ته د تګ څخه ډډه وکړئ. بهر ته د تګ پر مهال ماسک واغوندئ. د کور دننه د بېرته راستنېدو په وخت کې لاسونه، مخ او سترګې ومینځئ. عمر خوړلو کسانو او ماشومانو ته باید اضافي پاملرنه وشي.»
تر دې وړاندې هم د هوا ککړتیا له امله ځايي حکومت د څو ورځو لپاره په لاهور ښار کې ګرځبندیز اعلان کړی و.
