د ملګرو ملتونو سرمنشي په غزه کې د بشپړ اوربند غوښتنه وکړه
د ملګرو ملتونو سرمنشي په غزه کې د موقت اوربند د غځولو هرکلی وکړ. په ورته وخت کې انتونیو ګوتریش ټینګار کړی چې په غزه کې باید بشپړ بشردوستانه اوربند رامنځته شي. د قطر د بهرنیو چارو وزارت د دوشنبې په ورځ اعلان وکړ چې د حماس او اسرايیل ترمنځ اوربند د دوو ورځو له پاره غځول شوی دی.
ښاغلي ګوتریش همداراز ټینګار وکړ چې ملګري ملتونه په سیمه کې د هر اړخیز اوربند د رامنځ ته کولو د هڅو ملاتړ کوي.
د ملګرو ملتونو د سرمنشي ویاند سټیفن دوجاریک هم اعلان وکړ چې انتونیو ګوتریش له ټولو هیوادونو غواړي چې د دې شخړې د پای ته رسولو له پاره له خپل اغېز څخه کار واخلي او د دوو دولتونو د حل لارې ملاتړ وکړي.
رویټرز تر دې وړواندې راپور ورکړی و چې سپینې ماڼۍ ویلي چې په غزه کې د جګړې دواړو خواوو پر اوربند هوکړه کړې ده. په همدې حال کې الجزیرې خبر ورکړی، چې اسراییل د نورو یرغمل شویو د تبادلې له پاره دوه ورځنی اوربند منلی دی.
د نوې هوکړې له مخې به هره ورځ د اوربند غځولو له پاره د حماس ۱۰ تنه یرغمل شوي او ۳۰ تنه فلسطیني بندیان خوشي کیږي.
