د اسراییلي یرغملو او فلسطیني بندیانو تبادله او د اوربند وروستۍ ورځ
د یرغملو او فلسطیني بندیانو د تبادلې لپاره د اسراییل او حماس ترمنځ څلور ورځنی اوربند نن پای ته رسېږي؛ خو دواړه خواوې وايي، چې د نورو یرغمل شویو او بندیانو د تبادلې لپاره د موقت اوربند غځولو ته چمتو دي. تمه کیږي، چې په لسګونه اسراییلي یرغمل شوي او فلسطیني بندیان نن تبادله شي.
د تېرې یکشنبې په ورځ ۱۷ یرغمل د ۳۹ فلسطینیانو په بدل کې تبادله شوي وو.
حماس د اکټوبر د اوومې د بریدونو په پایله کې له نیول یرغملو اسراییلیانو له ډلې تر اوسه ۵۸ کسان خوشې کړي دي.
په همدې حال کې اسراییل هم تر اوسه ۱۱۷ فلسطیني بندیان خوشي کړي دي.
ډېری خوشې شوي یرغمل او بندیان ښځې او ماشومان دي.
تمه کیږي چې د بندیانو او یرغملو یو بله تبادله نن هم ترسره شي.
د امریکا د ملي راډیو این پي ار د رپوټ له مخې؛ دا شونتیا شته دی، چې اوربند د دوو نورو ورځو لپاره هم وغځول شي، ځکه چې حماس په لسګونو یرغمل په غزه کې د تبادلې لپاره راټول کړي دي.
ویل کیږي لا هم ۱۷۰ اسراییلي یرغمل په غزه کې شته او د اسراییل په زندانونو کې د شته فلسطینیانو شمېر بیا زرګونو ته رسیږي.
د اسراییل لومړي وزیر په یوې خپرې شوې ويډیو کې ویلي، چې نوموړی دې ته چمتو دی چې د هرو لسو یرغمل شویو د خوشې کېدو په بدل کې اوربند د ۲۴ ساعتونو لپاره وغزوي او دغه راز تر ۱۵۰ فلسطینیان د اسراییل له زندانونو خوشې کړي.
پر اسراییل د حماس د اکټوبر د اوومې په برید کې دغې ډلې ۲۴۰ اسراییلي وګړي یرغمل کړي او شاوخوا ۱۲۰۰ کسان یې وژلي وو.
د دغه برید د غچ اخیستو په موخه اسراییل پر غزې د اوو اونیو لپاره پراخې بمبارۍ او ځمکني عملیات پیل کړل، چې په پایله کې یې ۱۳،۳۰۰ فلسطینیان چې ډېری یې ماشومان او مېرمنې وې ووژل شول او پراخې سیمې ویجاړې شوې. د اسراییل د بریدونو په پایله کې لسګونه زره فلسطینیان د خپلو کورونو پرېښودلو ته اړ شول.
