قطر: سبا د جمعې په ورځ ۷ بجې د اسراییل او حماس اوربند پیلیږي

د قطر د بهرنیو چارو وزارت ویاند وايي، د اسراییل او حماس تر منځ د اوربند تړون به سبا د جمعې په ورځ «د لیندۍ درېیمه» پیل شي. مجید الانصاري نن په یوه خبري غونډې کې وویل، چې دا اوربند به سبا اوه بجې پیل او هر څومره چې زر کېدی شي غزې ته به بشري مرستې ورسیږي.

که څه هم د دغه اوربند د تړون په باب لومړني تفصیلات د اسراییل د حکومت له خوا ورکړل شوي؛ خو د قطر د بهرنیو چارو وزارت ویاند وايي، چې د حماس له خوا د ملکي یرغمل شویو اسراییلیانو لومړۍ ډله به د جمعې په مازیګر څلور بجې اسراییل ته وسپارل شي.

الانصاري زیاتوي، چې په لومړۍ ډله کې دیارلس مېرمنې او ماشومان هم شامل دي.

د نوموړي په خبره، د دغه تړون په پایله کې به سبا هغه فلسطینیان هم خوشي شي، چې د اسراییل په زندانونو کې دي.

تېره ورځ د اسراییل لومړي وزیر بنیامین نتنیاهو په یوه بیان کې ویلي، چې د حماس له خوا یرغمل شوې ۵۰ ښځې او ماشومان به په څلورو ورځو کې خوشي شي او په دې ورځو کې به نښتې ودریږي.

پرون هم په یوه اعلاميه کې ويل شوي، چې د هرو لسو نورو يرغمل شويو د خلاصون په بدل کې به د نښتو د ختمولو لپاره يوه ورځ نوره هم زياته شي.

د اسراییل د صدراعظم ویاند له فلسطینی بندیانو سره د دغو یرغمل شویو د تبادلې یادونه نه ده کړې.

حماس دا هم ویلي چې د جګړې بندول به غزې ته د بشردوستانه توکو، طبي توکو او تیلو لاریو ته د ننوتلو اجازه ورکړي.

دغې ډلې ویلي دي چې اسراییل ژمنه کړې چې د اوربند پر مهال به د غزې په هېڅ سیمه برید نه کوي او نه به څوک بندیانوي.

دا لومړی ځل دی چې اسراییل او حماس د یوې ډلې یرغمل نیونې او د فلسطیني بندیانو د خوشي کولو په اړه هوکړه کوي. حماس تر دې مخکې هم څلور برمته شوي کسان خوشي کړي وو.

دا هوکړه د قطر حکومت په منځګړتوب له څو اوونیو خبرو اترو وروسته شوې ده.

تر ۲۰۰ زیات یرغمل شوي کسان چې ډیری یې اسراییليان دي، حماس د تلې په ۱۵مه پر اسراییل د خپل برید پرمهال غزې تړانګې ته ولیږدول.