د اوکراین د کورنیو چارو وزیر: روسیې په تازه بریدونو کې ۹ ملکي وګړو ته مرګ ژوبله اړولې
اوکرایني چارواکي وايي، چې پر اوکراین د روسي ځواکونو په تازه بریدونو کې ۹ ملکي وګړو ته مرګ ژوبله اوښتې ده. د اوکراین د کورنیو چارو وزیر ویلي، چې روسیه په لوی لاس اوکرایني عام وګړي په نښه کوي او په خرسون کې یې په توغندیز برید کې درې تنه وژلي او پنځه نور ټپیان دي.
د اوکراین د کورنیو چارو وزیر ایهور کلیمینګو نن پنجشنبه رسنیو ته ویلي، چې د خرسون سربېره روسي بې پېلوټه الوتکو پر بریسلاف ښار هم بریدونه کړي، چې له امله یې یو سپین ږیری وژل شوی دی.
نوموړي زیاته کړې، چې په دواړو بریدونو کې د ملکي وګړو کورونه، دوکانونه او عامه ځایونه ویجاړ شوي دي.
د دغې مرګ ژوبلې په اړه روسیې څه نه دي ویلي؛ خو له دې وړاندې روسي چارواکو له اوکراین سره په جګړه کې د ملکي وګړو مرګ ژوبله نه ده تایید کړې او ویلي یې دي، چې دوی د جګړې قوانین په پام کې نیسي او هڅه کوي، چې ملکي وګړو ته مرګ ژوبله وا نه وړي.
