پوتین: د افغانستان او د سیمې د امنیت په اړه مې د تاجکستان له ولسمشر سره خبرې وکړې
د روسیې د تاس دولتي خبري اژانس د راپور له مخې؛ ولسمشر پوتین ویلي چې د سې شنبې په ورځ ناوخته یې د تاجکستان له ولسمشر امام علی رحمان سره په لیدنه کې د منځنۍ اسیا د امنیت په اړه خبرې کړي دي.
پوتین په هغه اعلامیه کې چې تر مجلس وروسته خپره شوې ده ویلي: “په منځنۍ اسیا کې د امنیت په مساله خبرې وشوې، په ځانکړې توګه د هغه مسایلو په اړه چې په افغانستان کې روان دي.”
په دغه اعلامیه کې راغلي، چې په ټولیزه توګه د خبرو اترو تمرکز د سیمه ییزو او نړۍوالو مسالو په اړه وو.
تېره ورځ د روسیې ولسمشر له خپل تاجکستاني سیال امام علي رحمان سره په لومړۍ کتنه کې وویل، چې دوی به د افغانستان پر امنیتي او اوله درجه مسایلو خبرې وکړي.
ولادیمیر پوتین زیاته کړې وه، چې دا خبرې د ډله ییز امنیتي د تړون د سازمان د غونډې په څنډه کې مهمې دي.
د ډله ییز امنیتي تړون د سازمان د امنیت شورا غونډه په بېلاروس کې د نومبر تر ۲۳مې نېټې پورې دوام لري.
