طالبانو د اسراییل او حماس ترمنځ د اوربند هرکلی وکړ او د تلپاتې اوربند غوښتنه یې وکړه
طالبانو د حماس او اسراییل تر منځ د څلورو ورځو لپاره پر اوربند د هوکړې اعلان د غزې د خلکو د لا زیاتو ملکي تلفاتو د مخنیوي پر لور یو مثبت ګام بللی. طالبان وایي؛ فلسطینیانو ته دې حق ورکړل شي چې د نورو ملتونو په څېر پر خپل تاریخي قلمرو مستقل دولت ولري.
د طالبانو د بهرنیو چارو وزارت د چهارشنبې په ورځ (د لیندۍ په لومړۍ) د یوې اعلامیې په خپرولو سره د حماس او اسراییل ترمنځ د څلور ورځني اوربند هرکلی کړی او دا یې د غزې ولس د لا زیاتو ملکي تلفاتو د مخنیوي پر لور یو مثبت ګام بللی.
د طالبانو د بهرنیو چارو وزارت دا اعلامیه په داسې حال کې خپروي، چې اسراییل او حماس د څلور ورځني اوربند او غزې ته د بشري مرستو د استولو په موخه د ۵۰ یرغمل شویو د خوشې کولو هوکړه وکړه.
په دغه اعلامیه کې طالبانو د بشري موقت اوربند د اعلان او د غزې اړمنو خلکو ته د بشري مرستو د رسولو په برخه کې د قطر دولت فعاله ډېپلوماسي ستایلې ده.
اعلامیه زیاتوي: «په غزه کې د بشري حقونو د نقض او د صهیونیستی رژیم له خوا د ټولو بشري حدودو ماتولو په تړاو د غربي دولتونو او د بشري حقونو مدعي سازمانونو دوهګوني چلن د دوی اعتبار ته نه جبرانېدونکی زیان ورساوه.»
په دې اعلامیه کې طالبانو د فلسطین د قضیې د حل په اړه لیکلي: «د فلسطین د قضیې جامع او تلپاتې حل دا دی، چې د تاریخي فلسطین د اراضي اشغال پای ته ورسېږي او فلسطینیانو ته حق ورکړل شي چې د نورو ملتونو په څېر پر خپل تاریخي قلمرو مستقل دولت ولري.»
